الحلـــــــقة الثامنــــــــة
ناديه : طب هو جاب رقم المدينه منين ؟؟؟؟
شيري : هو ده اللى همك يا بنتى الموضوع اكبر من كده
ناديه : ازاى ؟؟؟؟؟؟
شيري : اولا : واضح جدا انه معاه رقم المدينه وبيستخدمه عادى جدا ممكن يكون اخده من اى بنت فى المدينه او اى ولد بيستخدم الرقم ده
ثانيا : هو يعنى مش عمل جريمه لا تغتفر علشان انه يستعجل قوى كده
ثالثا : الواد ده فى دماغه حاجه من اتنين وملهمش تالت
ياما هو فعلا عايز يستغلك فى موضوع المحاضرات وانك انتى تحضري وتكتبي كويس وبكلمتين حلوين هتعمليله اللى هو عايزه
ياما هو فعلا مهتم بيك وعايز يتقرب منك بشكل او باخر
انا بقي مش برجح التانى مش لسبب معين لانك محترمه ومش ده النوع اللى هو بيدور عليه
ناديه : انا قلبي كان بيدق وخايفه المشرفات يكونوا اخدوا بالهم ويقولوا على زى اى حد من الناس التانيين
شيري : مين اللى كانت موجوده تحت ؟؟؟؟
ناديه : المشرفه مرفت
شيري : لالالالا دى صحبتى مننا وعلينا مش تقلقي ولو حست بحاجه هتقولى
ناديه : طيب بكره لما يجي ويكلمنى هعمل ايه ؟؟؟
شيري : مش تعملى حاجه ومش تتكلمى فى حاجه وهو اكيد هيبدأ الكلام لو اعتذر قليله انا اسفه جدا بس مش احب غير اهلى اللى يكلمونى فى المدينه وبس مش تفتحى معاه فى الكلام
ناديه : طيب بس هو اكيد هيكون عايز يوضح بالتفصيل
شيري : اسمعى منه ومش تعلقي وبعد ما يخلص كلامه قوليله طيب وبس وحسسيه انك مضايقه
ناديه : اوك مش عارفه هقدر اعمل كده ولالا
شيري : بصراحه انا مستغربه هو بيعمل كده ليه
عقل شيري: (انا والله حاسه ان الواد عايز يلعب بناديه صعبانه على ناديه حاسه انها فرحانه انه بيكلمها وخصوصا انه شاب مشهور جدا فى الجامعه بحاجات كتير بس قلقلانه على ناديه لان
احساسها ممكن يتمادى وساعتها مش هعرف الم الموضوع تانى على العموم انا مش هسيبها الا لما اعرف الواد ده عايز منها ايه وان شاء الله مش يضايق ناديه باى شكل من الاشكال
ناديه : انتى روحتى فين بكلمك مش بتردى
شيري : لا ابدا انتى عارفه الالهام لما بيجي مش بشوف قدامى طب يالا نشوف اللى ورانا
انتهى اليوم وشيري حاسه بناديه وهى شارده وبتعمل حوار بينه وبينها وبترد عليه باين عليها قوى انها مشغوله ربنا يعينك يا رب على بكره يا ترى الحوار هيكون ازاى وناديه هتعمل ايه ؟؟؟؟؟؟؟
جاء اليوم التالى جميل مشرق يعكس هالته على وجه ناديه
شيري : ناديه انتى صحيتى ؟
ناديه : من زمان انا بفكر البس الدريل الجينز بتاعك ؟؟؟؟
شيري : بس محتاج مكوى من تحت علشان كان متنى من تحت
ناديه : مانا كويته ههههههههه
شيري : انتى صاحيه من بدرى بقي
ناديه : بقولك البس عليه ده ولا ده
شيري : لا ده ولا ده طبعا : البسي البدى الابيض بتاعى نظيف ومطبق عندك والبسي الطرحه الشيفون اللبنى ومعاها البندانه البيضه
ناديه :ههههههههههههه ايه ده كله
شيري: انا لسه مش فوقت بس هيبقوا حلوين عليكى انا رايحه الحمام
ناديه: طيب
شيري : بعد ما خرجت ناديه ال...........
ناديه : صبيته لما ترجعي هتشربيه انا حطيتلك لبن عليه صح
شيري : والله انا مش عارفه اقول ايه غير ان امى دعيالى والله
رجعت شيري من الحمام وهى تنظر الى ناديه وتصفر وتقول كمان يقول الريحانى ايه ده كله ايه ده كله
ناديه (محرجه ): هو ايه ده كله ؟؟؟؟
شيري : لالالالا استنى متبهدليش اللى انتى عملاه بلفه الطرحه بتاعتك استنى انا هلفهالك
ناديه : ليه هو انا بلفها وحش
شيري : لا طبعا بس ماما بلفها زى ما نتى بتلفيها كده
ناديه : مش انا زى امك برضه يا بنتى
شيري : استنى بقي واتعدلى ها كده اهه ادينى خلصت ايه رأيك ؟؟؟؟
ناديه : ايه التغير الفظيع حلوه جدا جدا
شيري : خذى بقي دى رطبي بيها وهتبقي مش ناقصك غير العريس
ناديه بتضحك وبتضرب شيري بالمخده وشيري بتضحك وبتقول
شيري : لولا انى خايفه ابهدل الطرحه كنت رديت عليكى بالمثل
ناديه : طب هتنزل المره ديه بس المره الجايه لا يمكن يحصل ابدا (وش عبدالفتاح القيصري)ل
الباب يخبط وصوت ياسمين : ناديه صحيتى
ناديه وهى تفتح الباب : ايوه يا ياسمينا ادخلى
ياسمين: قلقتينى لما مش نديتى على قلت راحت عليكى نومه
ناديه : لا بس شيري كانت معطلاانى
ياسمين : ايه ده كله ايه ده كله ايه اللى انتى لبساه ده بتاع شيري
شيري : اصلي غلطت وقلت ادفع تمن غلطتى دلقت عليه لبسها شويه شاي من غير قصد وحلفت عليها ما تكوى وتلبس ده ايه رأيك بذمتك مش هيكون منها حته
ياسمين : لا بجد شكله حلو قوى عليكى يا ناديه انتى حاطه كريم تفتيح؟؟؟
شيري : مانا قلت اكمل اصلها حطت فير اند لافلي بتاعى وبالعافيه رديت تحط
ياسمين : لا نتيجته فعاله بجد وشك منور ومبيض
ناديه : طب ممكن يالا بقي علشان نمشي
ياسمين : طب استنى اروح اجيب الحاجه بتاعتى وانزل واخبط على ايمان زمنها خلصت
ناديه : طب يالا بسرعه
شيري وهى تغلق الباب: اياكى ثم اياكى تقولى ان بياض وشك ده طبيعي والا هيسود فى ساعتها هههههههه
ناديه : مانا لاحظت وانتى عماله تردى بالنيابه عنى
شيري : المهم انتوا اخرتونى انتم الاتنين
جأت ياسمين وايمان اللى مصدقت شافت ناديه وكانها شافت حاجه حلوه ونزلت تمدح فيها راحت ياسمين سكتتها وقالتها كفايه كده لتطول ومش نطول نتكلم معاها وضحكوا جميعا وذهبوا للكليه
وفى الكليه حدث ما لم يحمد عقباه
وهذا ما سنراه فى الحلقه القادمه
ليست هناك تعليقات:
إرسال تعليق