الحلقه ال16
فى الحلقه السابقه عرفنا ان امانى واحمد ارتبطوا وان احمد جاب دبلتين فضه ليه ولامانى وانه وعدها بالزواج بعد الكليه وانه هيحارب
الدنيا كلها عشانها وكانوا بيفكروا انهم يعلنوا ارتباطهم لكن امانى طلبت منه الانتظار للوقت المناسب واما بالنسبه لايمي وخالد واللى كانت
ليلتهم رومانسيه وانتهت بجرس بعد ان كانوا يجهزون نفسهم للنوم و............ ياترى كان مين اللى جاى فى الوقت ده ده بقي اللى هنعرفه
دلوقتى
رن جرس الباب عند ايمي وخالد وكان وضعهم لايسمح انهم يفتحوا الباب لحد وكانت الاغانى شغاله يعنى اكيد اللى بره سامع ان فى حد
فى البيت ايمي قالت نفتح بس خالد قالها مش فاضيين ثم يعنى تكونى بين ايدي واسيبك وافتح الباب انسي وكملوا اللى بيعملوه وبعد ساعه
تقريبا كانت ايمي تاخد دش وخالد بيلعب بلاي ستيشن رن جرس الباب مره اخرى فقام خالد وفتح الباب
خالد: ملك مش معقول ....فينك يابنتى
ملك : مانا عماله اخبط عليكم من ساعه محدش بيرد
خالد : كنا نايمين المهم اخبارك ايه
ملك : قال يعنى بتسأل قوى ايه يابنى انا لو اعرف انك لما تتجوز هتعمل كده مكنتش جوزتك امال فين ايمي.....؟؟؟؟؟
خالد: ايمي ....فى الحمام ثوانى هبلغها هى ماما فين والواد خالد فين ؟؟؟؟
ملك : خالد مع ماما فى الشقه بس انا قلت اشوفكم موجودين نيجي ولا لا ؟؟؟؟
خالد: لا تعالوا طبعا مستنينكم
ملك : طب بص ابقي اتصل انت بانس خليه يجي على هنا
خالد: اوك
ملك : هروح انا انادى ماما
خالد: طيب
دخل خالد وبلغ ايمي وخرجت ايمي وارتدت ملابسها وجهزت الصاله وقفلت باب الاوضه بتاعه النوم بتاعه خالد ودخلت على المطبخ
علشان تجهز العصير وخالد دخل اخد دش وغير لبسه واتصل بانس واتفق معاه انه يجي عليه وبعد ربع ساعه جت ام خالد وملك وابنها
واول ما دخلت ملك قالت
ملك: قلنا مش عايزين تشفونا فقلنا نيجي احنا ونشوفكم
ايمي : ازاى بقي مين قال كده انتم منورنا واكيد عايزين نشوفكم بس انتى عارفه بقي الكليه بدأت والشغل بتاع خالد كمان
ملك: لالالا برضه زعلانه طيب اتصلي اطمنى على وعلى خالد وطمنينا عليكى
ايمي : والله مشغوله ياملك يعنى انا باجي من الكليه نتغدى وننام ونصحى خالد يروح الشغل وانا ابدأ اشوف محاضراتى واخلص الاقي
خالد جه نتعشي وننام ده يومي
ملك : طب يا ستى بس برضه لازم تتصلي تطمنى
ايمي : ان شاء الله وانتى برضه اتصلي انا معرفش مواعيدك
ملك : انا متاحه طول اليوم وبجد اخر زهق وخالد مغلبنى ربنا يوعدك يارب كده بطفل هادى مش شقي زى الواد ده
ايمي: الله يعينك ان شاء الله ثوانى هاجيب عصير
ام خالد : لالالالا مش عايزه عصير اللى بتعمليه دايما مسكر انا عايزه شاي ومش تحطى السكر انا اللى هحطه
ايمي نظرت لخالد: حاضر يا ماما
طبعا ايمي متغاظه جدا ومضايقه من اللى كلام ام خالد بس مش عايزه ترد وتزعل خالد وفى نفس الوقت قالت انها تحتسب الاجر عملت
شاي لام خالد وجابت العصير
خالد: ما العصير حلو اهه ولا مسكر ولا حاجه
ام خالد: مانت خلاص بقي اى حاجه هتعملها عتعجبك مش مراتك
خالد: والله يا ماما احلى حاجه عملتها من ساعه ما اتولدت انى اتجوزت ايمي
ثم نظر الى ايمي بينما ملك ردت عليه
ملك : واله ي اايمي انتى ممتازه والعصير جميل تسلم ايدك انتى اللى عصراه ولا جاهز
حاولت ملك تلطف الجو بعد كلام امها واللى كانت مضايقه جدا من ايمان وطبعا هم متفهمين انها بتغير منها بس مش بيرضوا يضايقوها
ايمي : لا انا مجهزاه بجيب المانجه واقطعها واكيسها فى الفريز وقت ما يجيلي ضيوف او احنا نحب نشرب بجيبها واعصرها ولانها
حلوه مش بحطلها سكر
قالت كده وهى بتبص على ام خالد
ام خالد: انت عامل ايه فى شغلك يا حبيبي مش بتحكيلي زى زمان والدكتوره اللى كانت مضايقاك لسه بضايقك
خالد: الشغل كويس ياماما والدكتوره راحت انتداب لكليه تانيه ومبقناش نشوفها كتير والحمد لله
ايمي : دكتوره مين ؟؟؟؟
خالد: لا واحده مش بتدى الا تالته ورابعه اعتقد متعرفهاش دكتوره امل لابسه طرحه ودايما بتطلع الحلق منها وشكلها بيبقي تحفه كده
ايمي: لا مش شوفتها وكانت مضايقاك فى ايه
خالد: لا الموضوع كبير على رواقه ابقي احكيهولك
ايمي : اوك
ام خالد: مفيش حلويات جنب الشاي
ايمي : لا معنديش خالد انزل جيب لماما حلويات
ام خالد: لا هتتعب يا حبيبي مش مهم بس ازاى ميبقاش عندكم حلويات
ايمي : انا مليش تقل عليها فمش بجبها
ام خالد: يعنى حاجه مش عاجباكى مش تسالى يمكن خالد تكون عاجباه
ايمي : مانا بسأله اذا محتاج نجيب ولو مش محتاج خلاص منجبش
ايمي اتخنقت جدا وكانت نفسها تعيط مفيش حاجه عاجباه ام خالد وهى بتحاول مش تضايقه استأذنت ايمي علشان ترد على التليفون
ملك : ايه يا ماما في ايه مالك كده متحفزه عليها قوى كده
خالد: ماما ايمي ممتازه معايا ومريحانى ليه بتضايقيها
ام خالد: انا بضايقها انا بعلمها الاتيكيت ازاى ميكنش في عندها حلويات للضيوف بلاش ليها وبعلمها انها مش تفرض حاجه على الضيوف
لازم تسالهم الاول
خالد: يبقي مش بالاسلوب ده انا مش عارف ليه انتى اخده منها موقف كده ومتنسيش انها حامل والموضوع ممكن يأثر فيها بزياده
ام خالد: يعنى انا اللى غلطانه فى الاخر
ملك: ماما انتى مضايقه منها فى حاجه يعنى عملت معاكى موقف كده ولا كده
ام خالد : لا بس حاسه انها مش مهتمه باخوكى بشوفه وهو نازل الصبح مش زى زمان قميصه تحسي انه مش مكوى البدل بتاعته تحسي
انها مكسره لبسه البياض بتاعه مش زى اول بجد حاسه انها بهدلته
كان خالد لابس تيشرت اسود وعليه كلمه بالابيض وبرمادا ابيض
خالد: ماهو ابيض اهه وزى الفل
ام خالد: لالالا مش زى ما كان معايا وده تلاقيه لسه جديد ولا حاجه والنهارده لما عرضت عليها انى اخد المفتاح واجبلها الخدامه الصبح
علشان البيت مترب ردت على انى مش بحب حد يلمس حاجاتى قال يعنى هاسرقها ولا اخدها لى
ملك: ماما انتى قلتيلها كده ده انا لو حماتى قالتلى كده انتى نفسك كنتى هتزعلى منها جدا واكيد ايمي مش قصدها كده
ام خالد: امال مش اديتنى المفتاح ليه
ملك : انا مش مديه مفتاح شقتى لحماتى ومش احب انها تيجي تدخل على سواء وانا موجوده او مش موجوده
ام خالد: لا بس انتى ادتيها المفتاح
ملك: ايوه ساعه ما سافرت وكنت مضطره اديهولها وهى عمرها ما طلبته وانس هو اللى ادهولها علشان لو مش موجودين وفى حاجه هى
تتصرف
ام خالد: شوفتى اهه انس اداه لامه اخوكى عمل كده
خالد: ماما انتى عايزه المفتاح خديه بس ليه عايزه تاخديه
؟؟؟؟؟
ام خالد لا انا مش عايزاه انا بس كنت عايزه اريحه واخلى الخدامه تظبتلك شقتك بدل ما هى متبهدله
خالد: ماما ...انتى عارفه ان ..... طب خلاص علشان ايمان جايه
ايمي : دى ماما بتسلم عليكوا
ام خالد: الله يسلمها وانتى عامله ايه فى الحمل يا ايمي
ايمي : الحمد لله بخير فى مغص بيروح ويجي بس الحمد لله
ام خالد : طب ربنا معاكى مش يالا يا ملك علشان يرتاحوا
خالد: انتى رايحه فين انا اتصلت بانس هنكملالسهره والعشا هنا ان شاء الله
ام خالد: طب انا هسيبكم واريح اصلي عايزه انام
خالد: بدرى كده متستنى شويه واسهرى معانا
ام خالد: لالالا انا عايزه انام
خالد : طب تعالى اوصلك
وصل خالد امه لشقتها وحاول يراضيها وبعدين رجعلهم وكانت ملك مندمجه جدا مع ايمي وبتحكيلها عن انها متغاظه من انس وانها
حاساه اتغير ومش عارفه تعمله ايه ولما جه خالد مكملتش ملك قعدوا يحكوا لحد ما جه انس وعرض عليهم خالد يتعشوا ويتفرجوا على
فيلم هو جايبه جديد واتعشوا وهم بيتفرجوا ع الفيلم كانت ايمي عملت فيشار وفى اخر السهره وهم ماشيين اخدت ملك ايمي على جنب
وقالتلها
ملك: بصي يا ايمي متزعليش من ماما هى بتحبك والله بس مضايقه ان خالد بعد عنها شويه وده شعور طبيعي طبعا
ايمي : مش تقلقي انا مش زعلانه وفاهمه كويس شعورها وهى زى امى واكتر والله
ملك: والله كل يوم بيزيد حبي ليكى سبحان الله
ايمي : الحمد لله
وهنا نادى انس على ملك وقالها يالا الوقت متاخر الناس عايزه تنام
سلموا على بعض وروحوا وايمي كانت عايزه تنام جدا بس خالد طلب منها انها متزعلش من امه وانها ست كبيره ومش تضايق منها
وفهمته انها عمرها ما هتضايق منها كفايه انك انت ابنها فرح خالد بنجاحه فى اختيار زوجته
مرت الايام والاسابيع وحب خالد لايمي بيزيد يوم عن يوم وحب احمد وامانى بيزيد يوم عن يوم وكانوا مقضينها تليفونات بعد الكليه
ورسايل فى الكشاكيل ورشا رجعت تانى وكان محمد فاتح منى فى الموضوع واللى وافقت بدون تردد رغم ان ظروف محمد وظروف منى
مكنوش اد كده بس ارتبطوا وبدأت اسابيع الامتحانات وخالد ساعتها اخد اجازه من شغل بالليل وكان قاعد مع ايمي بيذاكر معاها وبيساعدها
وخلص الترم الاول على خير وبتفوق والحمد لله وبرضه احمد ومحمد وامانى ومنى كلهم كان تقديرهم جميل وفى اجازه نص السنه راحت
ايمي عند والدتها وكانت فى الشهر السادس وظهر عليها علامات الحمل وهناك سابها خالد وسافر لوحده وفى الاجازه دى جت ام طارق
وسلمت على ايمي وسألت على اخبارها وسالت ايمي عن طارق وعرفت انه تقديره بقي مقبول وانه اتغير كتير ومتعرفش ايه اللى غيره
وقلقانه عليه وطلبت منها انها تتصل بيه وتكلمه يمكن تعرف حاجه ماهى اخته ترددت ايمي جدا فى الاتصال بطارق ومكنتش عارفه
تتصل ولا لا وفى الاخر اتصلت بعد ما سالت امها وقالتلها ده زى اخوكى ولكن المكالمه كانت عجيبه جدا وطارق كان انسان مختلف جدا
عن اللى عرفته من قبل
ايمي : الو ....طارق؟؟؟؟
طارق : ايوه .....مين معايا؟؟؟؟
ايمي : بسرعه كده نستنى انا ايمي ايمان ؟؟؟
طارق سكت شويه : ايمان ....بجد ؟؟؟؟
ايمي : شويه شويه هتقلي ايمان مين وانهى فيهم
طارق: انا فى حياتى كلها مفيش غير ايمان واحده ومش هيكون فى غيرها
ايمي: طبعا مانا اختك المهم طمنى اخبارك ايه والكليه اخبارك فيها ايه ودخلت قسم ايه ؟؟؟؟
طارق : انا اخبار لاجديد بروح الكليه وبرجع
ايمي: ايه يابنى الاكتئاب اللى انت فيه ده
طارق : مش مهم انا المهم انتى طمنينى عليكى عايشه ازاى وبتعملى ايه وعامله ايه مع اللى اتجوزتيه
ايمي مكنتش عايزه تتكلم معاه عن خالد لانها كده هضايقه ومش عايزه تقوله قد ايه هى سعيده بيه فقررت انها تنهى الحديث
ايمي: الحمد لله معلش يا طارق انا مضطره اقفل علشان الغدا اشوفك على خير
طارق: بجد يا ايمى يعنى ممكن اشوفك
ايمي: ممكن لو نفع تيجي عند ماما
طارق : انتى وحشانى قوى قوى بجد
ايمي: طيب سلام بقي ماما بتنادى
طارق سلام هكلمك بعد الغداء
حست ايمي انها غلطت وواضح ان طارق لازال مرتبط بيها بس ياترى هتكلمه ازاى وتقوله ايه مش عايزه تضايقه بس شكله كده هتضايقه
لو كلمه وحشانى جايه من اى حد تانى غير طارق كانت عديتها بس لانها من طارق فخليتها تندم على الاتصال بيه فقررت انها مش ترد
عليه لما يتصل وتتحجج بالنوم
ولكن وبعد الغداء رد احمد اخوها على التليفون وسلم على طارق ثم نادى لايمي واتحرجت لانها كانت قاليها لامها ومقلتش لاحمد انه يعتذر
لانها نايمه ردت عليه ولكن ايه اللى هيحصل بعد كده وهل اللى هتعمله ايمي ده هو ده الصح ؟؟؟؟؟؟؟؟؟؟؟؟؟؟؟؟ ولو عرفت خالد
هيبقي موقفه ايه ؟؟؟؟؟
ده اللى هنشوفه الحلقه الجايه ان شاء الله
ليست هناك تعليقات:
إرسال تعليق